Kva er ei ytring?
Retten til å ytre seg omfattar fridom til å ha meiningar og til å gi vidare opplysningar og idear utan offentlege inngrep. Ytringar kan derfor skje via aviser, sosiale medium, bøker, flygeblad, teikningar og måleri, fotografi, film, musikk, e-post. Hårfrisyre og klesdrakt kan også vere ytringar.
Kva er grunngivinga for ytringsfridom?
Ytringsfridommen er grunngitt i omsynet til demokrati, sanning og sjølvutfalding.
Kva er vilkåra for å avgrense ytringsfridommen?
EMK artikkel 10 punkt 2 gir myndigheitene høve til å avgrense ytringsfridommen. Når ein skal vurdere om ei avgrensing i ytringsfridommen er i strid med EMK artikkel 10, er det vanleg å stille tre vilkår: lovregel, formåla i artikkel 10 og nødvendigheit i eit demokratisk samfunn.
Kva omsyn skal ytringsfridommen vareta?
Ytringsfridommen skal vareta samfunnsdebatten i vid forstand. Den offentlege debatten er viktig for utviklinga av samfunnet vårt.
Kva meiner vi med blasfemi?
Med blasfemi meiner vi å spotte gudar eller religion.
Kva for ein kjend norsk forfattar vart i 1933 tiltalt for blasfemi?
Forfattaren Arnulf Øverland vart tiltalt for blasfemi i 1933 etter at han hadde halde foredraget «Kristendommen, den tiende landeplage».
Kva gjekk Jersildsaka ut på?
Jersildsaka var eit rettsoppgjer med ei rasistisk gruppe i Danmark (Grønnjakkene) som handla om ytringsfridommen i eit demokratisk samfunn. Retten slo fast at det var av interesse for samfunnsdebatten at folk får opplysningar om at nokre har ekstreme meiningar.