TEST DEG SJØLV side 95

Ein forbrukartvist er ein rettstvist der forbrukaren er kjøpar av ei vare eller teneste. Omgrepet i vid meining omfattar også kjøp av fast eigedom, og det er ikkje avgrensa til tilfelle med næringsdrivande seljar. Det omfattar også avtalar der begge partane er forbrukarar.

Forbrukarklagelova gjeld klager som Forbrukarklageutvalet kan behandle, jf. forbrukarklagelova § 1. Utvalet behandlar klager

1. om kjøp av ting til forbrukar og om ytingar som seljaren eller andre har teke på seg overfor kjøparen i tilknyting til kjøpet (både kjøp frå næringsdrivande og privat seljar)
2. om handverkstenester etter handverkstenestelova
3. om avtalar etter angrerettlova

Forbrukarklageutvalet behandlar mellom anna ikkje klagesaker mellom næringsdrivande.

Sidan forbrukarklagelova bruker det utvida forbrukarkjøpsomgrepet, sjå § 1(2), kan alle tvistar i forbrukarkjøp, anten seljaren er næringsdrivande eller ein privatperson, bli behandla i Forbrukarrådet og Forbrukarklageutvalet.

Forbrukarrådet meklar i forbrukartvistar for at partane skal komme fram til ei minneleg løysing, jf. forbrukarklagelova § 4(1).

Ein forbrukartvist kan førast inn for Forbrukarrådet for å finne ei minneleg løysing. Dersom det ikkje lèt seg gjere, kan partane føre saka inn for Forbrukarklageutvalet, som er eit forvaltningsorgan og ikkje ein domstol, jf. forbrukarklagelova §§ 4–6.

Eit vedtak i Forbrukarklageutvalet kan ein ikkje klage på, jf. § 7(4), men det kan overprøvast ved søksmål for tingretten, jf. § 12. Ved overprøving må motparten stemnast inn for tingretten innan ein månad etter at vedtaket er forkynt for partane. Dersom det ikkje blir gjort, får vedtaket verknad som ein dom.

Dette er ein av dei viktigaste reglane i lova. Dersom partane er passive overfor vedtaket og ikkje går til tingretten innan fristen, blir det forvandla til ein rettskraftig dom. Det vil mellom anna seie at dommen ikkje kan ankast. Han kan derfor tvangsfullbyrdast etter dei reglane som gjeld for dommar. Det vil seie at ein forbrukar som har fått medhald i FKU i eit krav om heving, kan bruke rettsapparatet til å få kjøpesummen betalt attende dersom ein vrangvillig seljar framleis nektar å betale attende pengane.